ਫੈਕਟ ਸਮਾਚਾਰ ਸੇਵਾ
ਭਿਵਾਨੀ , ਸਤੰਬਰ 9
ਬਹਿਲ-ਭਿਵਾਨੀ ਰੋਡ ‘ਤੇ ਬਿਧਨੋਈ ਤੋਂ ਓਬਰਾ ਪਿੰਡ ਵਿਚਕਾਰ ਦੋ ਮੋਟਰਸਾਈਕਲਾਂ ਦੀ ਟੱਕਰ ‘ਚ 3 ਵਿਅਕਤੀਆਂ ਦੀ ਮੌਤ ਹੋ ਗਈ। ਮ੍ਰਿਤਕਾਂ ਵਿੱਚੋਂ ਦੋ ਬਿਧਨੋਈ ਪਿੰਡ ਦੇ ਵਸਨੀਕ ਸਨ ਜਦਕਿ ਇੱਕ ਮ੍ਰਿਤਕ ਬਾਪੋੜਾ ਪਿੰਡ ਦਾ ਵਸਨੀਕ ਸੀ। ਸੂਚਨਾ ਮਿਲਣ ‘ਤੇ ਥਾਣਾ ਬਹਿਬਲ ਦੀ ਪੁਲੀਸ ਨੇ ਮੌਕੇ ‘ਤੇ ਪਹੁੰਚ ਕੇ ਲਾਸ਼ਾਂ ਨੂੰ ਕਬਜ਼ੇ ‘ਚ ਲੈ ਕੇ ਲੋਹਾਰੂ ਹਸਪਤਾਲ ਪਹੁੰਚਾਇਆ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਪਿੰਡ ਬਿਧਨੋਈ ਵਾਸੀ ਧਰਮਵੀਰ ਸਿੰਘ ਅਤੇ ਨਰੇਸ਼ ਕੁਮਾਰ ਅੱਜ ਸਵੇਰੇ ਕਿਸੇ ਕੰਮ ਲਈ ਬਾਈਕ ’ਤੇ ਸਵਾਰ ਹੋ ਕੇ ਓਬਰਾ ਵੱਲ ਜਾ ਰਹੇ ਸਨ। ਇਸ ਦੌਰਾਨ ਓਬਰਾ ਸਾਈਡ ਤੋਂ ਇਕ ਹੋਰ ਨੌਜਵਾਨ ਬਾਈਕ ‘ਤੇ ਆ ਰਿਹਾ ਸੀ। ਪਿੰਡ ਬਿਧਨੋਈ ਤੋਂ ਅੱਗੇ ਨਹਿਰ ਕੋਲ ਦੋਵੇਂ ਮੋਟਰਸਾਈਕਲਾਂ ਦੀ ਆਹਮੋ-ਸਾਹਮਣੇ ਟੱਕਰ ਹੋ ਗਈ। ਟੱਕਰ ਕਾਰਨ ਤਿੰਨੋਂ ਬਾਈਕ ਸਵਾਰ ਸੜਕ ‘ਤੇ ਡਿੱਗ ਗਏ। ਹਾਦਸੇ ‘ਚ ਬਿਧਨੋਈ ਦੇ ਦੋਵਾਂ ਵਿਅਕਤੀਆਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਜਦਕਿ ਤੀਜਾ ਬਾਈਕ ਸਵਾਰ ਗੰਭੀਰ ਜ਼ਖ਼ਮੀ ਹੋ ਗਿਆ। ਜ਼ਖਮੀ ਨੌਜਵਾਨ ਨੂੰ ਰਾਹਗੀਰਾਂ ਨੇ ਹਸਪਤਾਲ ਪਹੁੰਚਾਇਆ ਪਰ ਡਾਕਟਰਾਂ ਨੇ ਉਸ ਨੂੰ ਵੀ ਮ੍ਰਿਤਕ ਐਲਾਨ ਦਿੱਤਾ।
