ਫੈਕਟ ਸਮਾਚਾਰ ਸੇਵਾ
ਮੁੰਬਈ, ਮਈ 12
ਰਣਵੀਰ ਸਿੰਘ ਆਪਣੀਆਂ ਫਿਲਮਾਂ ਵਿੱਚ ਇੱਕ ਵੱਡਾ ਬਦਲਾਅ ਕਰਨ ਵਾਲੇ ਹਨ। ਉਹ ਇੱਕ ਮਸ਼ਹੂਰ ਲੇਖਕ ਦੀ ਸ਼ਿਵ ਤਿੱਕੜੀ (ਦਿ ਇਮੋਰਟਲਸ ਆਫ਼ ਮੇਲੂਹਾ ਸੀਰੀਜ਼) ‘ਤੇ ਆਧਾਰਿਤ ਇੱਕ ਫਿਲਮ ਵਿੱਚ ਨਜ਼ਰ ਆਉਣਗੇ। ਇਸ ਫਿਲਮ ਵਿੱਚ ਰਣਵੀਰ ਭਗਵਾਨ ਸ਼ਿਵ ਦੀ ਭੂਮਿਕਾ ਨਿਭਾਉਣਗੇ।
ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ ਰਣਵੀਰ ਸਿੰਘ “ਦਿ ਇਮੋਰਟਲਸ ਆਫ ਮੇਲੂਹਾ” ਕਿਤਾਬ ‘ਤੇ ਆਧਾਰਿਤ ਇੱਕ ਫਿਲਮ ਵਿੱਚ ਭਗਵਾਨ ਸ਼ਿਵ ਦੀ ਭੂਮਿਕਾ ਨਿਭਾਉਂਦੇ ਨਜ਼ਰ ਆਉਣਗੇ। ਰਣਵੀਰ ਨੇ ਆਪਣੀ ਪ੍ਰੋਡਕਸ਼ਨ ਕੰਪਨੀ ਮਾਂ ਕਸਮ ਫਿਲਮਜ਼ ਰਾਹੀਂ “ਦਿ ਇਮੋਰਟਲਸ ਆਫ ਮੇਲੂਹਾ” ਦੇ ਅਧਿਕਾਰ ਪ੍ਰਾਪਤ ਕੀਤੇ ਹਨ। ਇਹ ਕਿਤਾਬ ਅਤੇ ਇਸਦੇ ਦੋ ਸੀਕਵਲ ਮੇਲੂਹਾ ਦੇ ਪ੍ਰਾਚੀਨ ਰਾਜ ਵਿੱਚ ਇੱਕ ਹਿਮਾਲੀਅਨ ਯੋਧੇ ਦੀ ਕਹਾਣੀ ਦੱਸਦੇ ਹਨ। ਰਣਵੀਰ, ਬਿਰਲਾ ਸਟੂਡੀਓਜ਼ ਦੇ ਸਹਿਯੋਗ ਨਾਲ ਇਸ ਕਹਾਣੀ ਨੂੰ ਤਿੰਨ ਵੱਡੀਆਂ ਫਿਲਮਾਂ ਦੀ ਤਿਕੜੀ ਵਿੱਚ ਬਣਾਉਣ ਦੀ ਯੋਜਨਾ ਬਣਾ ਰਹੇ ਹਨ।
ਰਣਵੀਰ ਕਾਫ਼ੀ ਸਮੇਂ ਤੋਂ ਇਸ ਕਹਾਣੀ ਨੂੰ ਵੱਡੇ ਪਰਦੇ ‘ਤੇ ਲਿਆਉਣਾ ਚਾਹੁੰਦੇ ਸਨ। ਪੂਰੀ ਟੀਮ ਸਕ੍ਰਿਪਟ ‘ਤੇ ਕੰਮ ਕਰ ਰਹੀ ਹੈ। ਪਹਿਲੀ ਫਿਲਮ ਦੀ ਸ਼ੂਟਿੰਗ 2028 ਵਿੱਚ ਸ਼ੁਰੂ ਹੋਣ ਦੀ ਉਮੀਦ ਹੈ। ਫਿਲਹਾਲ ਪ੍ਰੋਜੈਕਟ ਦੇ ਵੇਰਵਿਆਂ ਨੂੰ ਗੁਪਤ ਰੱਖਿਆ ਜਾ ਰਿਹਾ ਹੈ ਅਤੇ ਨਿਰਦੇਸ਼ਕ ਨੂੰ ਅੰਤਿਮ ਰੂਪ ਨਹੀਂ ਦਿੱਤਾ ਗਿਆ ਹੈ। ਇੱਕ ਵਾਰ ਸਕ੍ਰਿਪਟ ਪੂਰੀ ਹੋਣ ਤੋਂ ਬਾਅਦ ਨਿਰਦੇਸ਼ਕ ਦੀ ਚੋਣ ਕੀਤੀ ਜਾਵੇਗੀ।
‘ਦਿ ਇਮੋਰਟਲਸ ਆਫ਼ ਮੇਲੂਹਾ’ ਅਮੀਸ਼ ਤ੍ਰਿਪਾਠੀ ਦੀ ਸ਼ਿਵ ਤਿੱਕੜੀ ਦੀ ਪਹਿਲੀ ਕਿਤਾਬ ਹੈ, ਜੋ 2010 ਵਿੱਚ ਪ੍ਰਕਾਸ਼ਿਤ ਹੋਈ ਸੀ। ਇਹ ਸ਼ਿਵ ਨਾਮਕ ਇੱਕ ਸਧਾਰਨ ਹਿਮਾਲਿਆਈ ਯੋਧੇ ਦੀ ਕਹਾਣੀ ਦੱਸਦੀ ਹੈ ਜੋ ਮੇਲੂਹਾ ਦੇ ਰਾਜ ਵਿੱਚ ਆਉਂਦਾ ਹੈ। ਇਹ ਕਹਾਣੀ ਮਿਥਿਹਾਸ, ਇਤਿਹਾਸ ਅਤੇ ਕਲਪਨਾ ਨੂੰ ਮਿਲਾਉਂਦੀ ਹੈ। ਇਸ ਤੋਂ ਬਾਅਦ ‘ਦਿ ਸੀਕਰੇਟ ਆਫ਼ ਦ ਨਾਗਾਸ’ ਅਤੇ ‘ਦਿ ਓਥ ਆਫ਼ ਦ ਵਾਯੂਪੁੱਤਰਸ’ ਆਈ। ਇਹ ਤਿੰਨੋਂ ਕਿਤਾਬਾਂ ਭਾਰਤ ਦੀਆਂ ਸਭ ਤੋਂ ਵੱਧ ਵਿਕਣ ਵਾਲੀਆਂ ਲੜੀਆਂ ਬਣ ਗਈਆਂ ਹਨ, ਜਿਨ੍ਹਾਂ ਦੀਆਂ ਅੱਜ ਤੱਕ 2.5 ਮਿਲੀਅਨ ਤੋਂ ਵੱਧ ਕਾਪੀਆਂ ਵਿਕੀਆਂ ਹਨ।
