ਫੈਕਟ ਸਮਾਚਾਰ ਸੇਵਾ
ਨਵੀਂ ਦਿੱਲੀ , ਜੂਨ 2
ਵਿਰਾਟ ਕੋਹਲੀ ਦੀ ਟੀਮ RCB ਨੇ ਲਗਾਤਾਰ ਦੂਜੀ ਵਾਰ ਆਈਪੀਐਲ ਟਰਾਫ਼ੀ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਜਿੱਤ ਦੀ ਖੁਸ਼ੀ ਮੈਦਾਨ ‘ਤੇ ਮਨਾਉਣ ਤੋਂ ਬਾਅਦ ਹੁਣ ਇਹ ਜੋੜਾ ਸਿੱਧਾ ਪ੍ਰੇਮਾਨੰਦ ਮਹਾਰਾਜ ਦਾ ਆਸ਼ੀਰਵਾਦ ਲੈਣ ਵ੍ਰਿੰਦਾਵਨ ਪਹੁੰਚ ਗਿਆ ਹੈ। 31 ਮਈ ਨੂੰ ਆਰਸੀਬੀ ਨੇ ਗੁਜਰਾਤ ਟਾਈਟਨਸ ਨੂੰ ਆਈਪੀਐਲ ਵਿੱਚ ਹਰਾ ਕੇ ਖ਼ਿਤਾਬ ਆਪਣੇ ਨਾਮ ਕੀਤਾ।
ਜਿੱਤ ਤੋਂ ਬਾਅਦ ਵਿਰਾਟ ਅਤੇ ਅਨੁਸ਼ਕਾ ਨੇ ਟੀਮ ਦੇ ਨਾਲ ਮੈਦਾਨ ‘ਤੇ ਜਸ਼ਨ ਮਨਾਇਆ ਜਿਸ ਦੀਆਂ ਤਸਵੀਰਾਂ ਅਤੇ ਵੀਡੀਓਜ਼ ਖੂਬ ਵਾਇਰਲ ਹੋਈਆਂ। ਅਨੁਸ਼ਕਾ ਨੇ ਵੀ ਟਰਾਫ਼ੀ ਦੇ ਨਾਲ ਪੋਜ਼ ਦਿੱਤੇ ਅਤੇ ਬਾਅਦ ਵਿੱਚ ਸੋਸ਼ਲ ਮੀਡੀਆ ‘ਤੇ ਵਿਰਾਟ ਕੋਹਲੀ ਅਤੇ ਪੂਰੀ ਟੀਮ ਨੂੰ ਵਧਾਈ ਦਿੱਤੀ। ਦੱਸ ਦੇਈਏ ਕਿ ਪਿਛਲੇ ਸਾਲ ਆਰਸੀਬੀ ਨੇ 18 ਸਾਲਾਂ ਬਾਅਦ ਆਪਣਾ ਪਹਿਲਾ ਖ਼ਿਤਾਬ ਜਿੱਤਿਆ ਸੀ ਅਤੇ ਇਸ ਸਾਲ ਇਹ ਉਨ੍ਹਾਂ ਦੀ ਲਗਾਤਾਰ ਦੂਜੀ ਜਿੱਤ ਹੈ।
ਮੈਦਾਨ ‘ਤੇ ਜਿੱਤ ਦਾ ਭਰਪੂਰ ਜਸ਼ਨ ਮਨਾਉਣ ਤੋਂ ਬਾਅਦ ਹੁਣ ਵਿਰਾਟ ਅਤੇ ਅਨੁਸ਼ਕਾ ਵ੍ਰਿੰਦਾਵਨ, ਪ੍ਰੇਮਾਨੰਦ ਮਹਾਰਾਜ ਦਾ ਆਸ਼ੀਰਵਾਦ ਲੈਣ ਪਹੁੰਚੇ ਹਨ। ਉਨ੍ਹਾਂ ਦਾ ਇੱਕ ਵੀਡੀਓ ਆਗਰਾ ਏਅਰਪੋਰਟ ਅਤੇ ਦੂਜਾ ਵ੍ਰਿੰਦਾਵਨ ਤੋਂ ਵਾਇਰਲ ਹੋਇਆ ਹੈ ਜਿੱਥੇ ਉਹ ਮਾਸਕ ਪਹਿਨੇ ਹੋਏ ਪ੍ਰੇਮਾਨੰਦ ਦੇ ਆਸ਼ਰਮ ਜਾਂਦੇ ਹੋਏ ਦਿਖਾਈ ਦੇ ਰਹੇ ਹਨ।
