ਫੈਕਟ ਸਮਾਚਾਰ ਸੇਵਾ
ਮੁੰਬਈ , ਜੂਨ 27
ਲੋਹਗੜ੍ਹ ਕਿਲ੍ਹੇ ਵਿੱਚ ਵਾਪਰੇ ਇਸ ਹਾਈ-ਪ੍ਰੋਫਾਈਲ ਕੇਤਨ ਅਗਰਵਾਲ ਕਤਲ ਕੇਸ ਦੀ ਕਹਾਣੀ ਕ੍ਰਿਕਟ ਦੇ ਮੈਦਾਨ ਤੋਂ ਸ਼ੁਰੂ ਹੋ ਕੇ ਇੱਕ ਖ਼ੌਫ਼ਨਾਕ ਸਾਜ਼ਿਸ਼ ਅਤੇ ਕਤਲ ਤੱਕ ਪਹੁੰਚੀ। ਪੁਲਿਸ ਜਾਂਚ, ਕਾਲ ਡਿਟੇਲਜ਼ ਅਤੇ ਮੁਲਜ਼ਮਾਂ ਦੇ ਕਬੂਲਨਾਮੇ ਦੇ ਅਧਾਰ ‘ਤੇ ਇਸ ਕੇਸ ਦੀ ਸ਼ੁਰੂਆਤ ਤੋਂ ਲੈ ਕੇ ਅਖੀਰ ਤੱਕ ਦੀ ਪੂਰੀ ਕਹਾਣੀ ਇਸ ਤਰ੍ਹਾਂ ਹੈ:
ਇਸ ਕਹਾਣੀ ਦੀ ਸ਼ੁਰੂਆਤ ਸਾਲ 2024 ਵਿੱਚ ਹੋਈ। ਮੁਲਜ਼ਮ ਸੀਆ ਗੋਇਲ ਦਾ ਭਰਾ ਸਾਹਿਲ ਗੋਇਲ, ਚੇਤਨ ਚੌਧਰੀ ਨਾਂ ਦੇ ਲੜਕੇ ਨਾਲ ਕ੍ਰਿਕਟ ਖੇਡਦਾ ਸੀ। ਮੈਚਾਂ ਦੌਰਾਨ ਸੀਆ ਵੀ ਅਕਸਰ ਆਪਣੇ ਭਰਾ ਸਾਹਿਲ ਦੇ ਨਾਲ ਜਾਂਦੀ ਸੀ। ਇੱਕ ਦਿਨ ਸਾਹਿਲ ਨੇ ਹੀ ਸੀਆ ਦੀ ਮੁਲਾਕਾਤ ਚੇਤਨ ਨਾਲ ਕਰਵਾਈ। ਉਸ ਸਮੇਂ ਇਹ ਇੱਕ ਆਮ ਦੋਸਤੀ ਸੀ।
ਸਾਲ 2025 ਵਿੱਚ ਦੀਵਾਲੀ ਦੇ ਮੌਕੇ ‘ਤੇ ਕੁਝ ਸਾਂਝੇ ਦੋਸਤਾਂ ਦੀ ਇੱਕ ਪਾਰਟੀ ਹੋਈ। ਇਸ ਪਾਰਟੀ ਵਿੱਚ ਸੀਆ ਅਤੇ ਚੇਤਨ ਦੁਬਾਰਾ ਮਿਲੇ। ਇੱਥੋਂ ਦੋਵਾਂ ਦੀ ਦੋਸਤੀ ਪਿਆਰ ਵਿੱਚ ਬਦਲ ਗਈ। ਦੋਵਾਂ ਨੇ Phone Numbers ਆਪਸ ਵਿੱਚ ਸਾਂਝੇ ਕੀਤੇ ਅਤੇ ਲਗਾਤਾਰ ਗੱਲਬਾਤ ਕਰਨੀ ਸ਼ੁਰੂ ਕਰ ਦਿੱਤੀ। ਦੋਵੇਂ ਇੱਕ-ਜੂਦੇ ਨਾਲ ਵਿਆਹ ਕਰਵਾਉਣਾ ਚਾਹੁੰਦੇ ਸਨ।
ਸੀਆ ਦੇ ਪਰਿਵਾਰ ਵਾਲਿਆਂ ਨੇ ਉਸ ਦਾ ਰਿਸ਼ਤਾ ਮਹਾਰਾਸ਼ਟਰ ਦੇ ਇੱਕ ਮਸ਼ਹੂਰ ਰੀਅਲ ਅਸਟੇਟ ਕਾਰੋਬਾਰੀ ਕੇਤਨ ਅਗਰਵਾਲ ਨਾਲ ਤੈਅ ਕਰ ਦਿੱਤਾ। ਸੀਆ ਵਿੱਚ ਆਪਣੇ ਮਾਪਿਆਂ ਨੂੰ ਚੇਤਨ ਬਾਰੇ ਦੱਸਣ ਦੀ ਹਿੰਮਤ ਨਹੀਂ ਸੀ, ਇਸ ਲਈ ਜਦੋਂ ਵੀ ਪਰਿਵਾਰ ਨੇ ਪੁੱਛਿਆ, ਉਸ ਨੇ ਹਾਂ ਕਰ ਦਿੱਤੀ ਅਤੇ ਕੇਤਨ ਨਾਲ ਉਸ ਦੀ ਮੰਗਣੀ ਹੋ ਗਈ।
ਪਰ ਸੀਆ ਅੰਦਰੋਂ ਇਸ ਰਿਸ਼ਤੇ ਤੋਂ ਬਹੁਤ ਨਾਖੁਸ਼ ਸੀ। ਉਸ ਨੂੰ ਕੇਤਨ ਪਸੰਦ ਨਹੀਂ ਸੀ (ਬਾਅਦ ਵਿੱਚ ਉਸ ਨੇ ਪੁਲਿਸ ਨੂੰ ਦੱਸਿਆ ਕਿ ਕੇਤਨ ਵਿੱਗ ਪਹਿਨਦਾ ਸੀ)। ਸੀਆ ਨੇ ਕੇਤਨ ‘ਤੇ ਮੰਗਣੀ ਤੋੜਨ ਦਾ ਦਬਾਅ ਵੀ ਬਣਾਇਆ, ਪਰ ਕੇਤਨ ਨੇ ਕਿਹਾ ਕਿ ਹੁਣ ਗੱਲ ਬਹੁਤ ਅੱਗੇ ਵਧ ਚੁੱਕੀ ਹੈ ਅਤੇ ਇਹ ਦੋਵਾਂ ਪਰਿਵਾਰਾਂ ਦੀ ਇੱਜ਼ਤ ਦਾ ਸਵਾਲ ਹੈ, ਇਸ ਲਈ ਵਿਆਹ ਕਰਨਾ ਹੀ ਪਵੇਗਾ।
ਮੰਗਣੀ ਹੋਣ ਦੇ ਬਾਵਜੂਦ ਸੀਆ ਨੇ ਚੇਤਨ ਨਾਲ ਸਬੰਧ ਖ਼ਤਮ ਨਹੀਂ ਕੀਤੇ। ਜਨਵਰੀ 2026 ਤੋਂ ਲੈ ਕੇ ਜੂਨ ਤੱਕ ਦੋਵਾਂ ਵਿਚਾਲੇ ਲਗਭਗ 2,004 ਕਾਲਾਂ ਹੋਈਆਂ ਅਤੇ 238 ਘੰਟੇ ਗੱਲਬਾਤ ਹੋਈ। ਸੀਆ ਦੇ ਭਰਾ ਸਾਹਿਲ ਨੂੰ ਜਦੋਂ ਇਸ ਰਿਸ਼ਤੇ ਦਾ ਪਤਾ ਲੱਗਾ ਤਾਂ ਉਸ ਨੇ ਸੀਆ ਨੂੰ ਚੇਤਨ ਤੋਂ ਦੂਰ ਰਹਿਣ ਦੀ ਸਲਾਹ ਦਿੱਤੀ, ਪਰ ਸੀਆ ਅਤੇ ਚੇਤਨ ਦੇ ਦਿਮਾਗ ਵਿੱਚ ਕੇਤਨ ਨੂੰ ਹਮੇਸ਼ਾ ਲਈ ਰਸਤੇ ਤੋਂ ਹਟਾਉਣ ਦਾ ਇੱਕ ਖ਼ੌਫ਼ਨਾਕ Plan ਚੱਲ ਰਿਹਾ ਸੀ।
18 ਜੂਨ ਨੂੰ ਸੀਆ ਅਤੇ ਕੇਤਨ ਮਹਾਰਾਸ਼ਟਰ ਦੇ ਇਤਿਹਾਸਕ ਲੋਹਗੜ੍ਹ ਕਿਲ੍ਹੇ ਘੁੰਮਣ ਗਏ। ਉੱਥੇ ਪਹਿਲਾਂ ਤੋਂ ਤੈਅ ਸਾਜ਼ਿਸ਼ ਦੇ ਮੁਤਾਬਕ, ਸੀਆ ਅਤੇ ਚੇਤਨ ਨੇ ਮਿਲ ਕੇ ਕੇਤਨ ਅਗਰਵਾਲ ਨੂੰ ਕਿਲ੍ਹੇ ਦੀ 400 ਫੁੱਟ ਡੂੰਘੀ ਖੱਡ ਵਿੱਚ ਧੱਕਾ ਦੇ ਦਿੱਤਾ। ਇੰਨੀ ਉਚਾਈ ਤੋਂ ਡਿੱਗਣ ਕਾਰਨ ਕੇਤਨ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ।
ਕੇਤਨ ਨੂੰ ਹੇਠਾਂ ਸੁੱਟਣ ਤੋਂ ਬਾਅਦ, ਸੀਆ ਨੇ ਖ਼ੁਦ ਨੂੰ ਬੇਕਸੂਰ ਦਿਖਾਉਣ ਲਈ ਜ਼ੋਰਦਾਰ ਚੀਕ ਮਾਰੀ ਅਤੇ ਸਭ ਨੂੰ ਦਿਖਾਇਆ ਕਿ ਇਹ ਇੱਕ ਹਾਦਸਾ ਸੀ। ਸੀਆ ਨੇ ਹੀ ਖ਼ੁਦ ਪੁਲਿਸ ਨੂੰ ਫ਼ੋਨ ਕਰਕੇ ਇਨਫਾਰਮ ਕੀਤਾ ਕਿ ਕੇਤਨ ਪੈਰ ਫਿਸਲਣ ਕਾਰਨ ਖੱਡ ਵਿੱਚ ਡਿੱਗ ਗਿਆ ਹੈ। ਜਦੋਂ ਸਥਾਨਕ ਲੋਕ ਅਤੇ ਗਾਰਡ ਰੋ-ਚਿੱਕ ਰਹੇ ਸਨ, ਤਾਂ ਸੀਆ ਬਿਲਕੁਲ ਸ਼ਾਂਤ ਖੜ੍ਹੀ ਸੀ, ਜਿਸ ਨੇ ਪਹਿਲੀ ਵਾਰ ਲੋਕਾਂ ਦੇ ਮਨ ਵਿੱਚ ਸ਼ੱਕ ਪੈਦਾ ਕੀਤਾ।
ਪੁਲਿਸ ਨੇ ਸੁਨੀਲ ਗਾਇਕਵਾੜ ਨਾਂ ਦੇ ਸ਼ਖਸ ਦੀ ਮਦਦ ਨਾਲ ਕੇਤਨ ਦੀ ਲਾਸ਼ ਨੂੰ ਖੱਡ ਵਿੱਚੋਂ ਬਾਹਰ ਕੱਢਿਆ। ਜਦੋਂ ਪੁਲਿਸ ਨੇ ਸੀਆ ਅਤੇ ਚੇਤਨ ਦੇ Mobile Phones ਦੀ ਜਾਂਚ ਕੀਤੀ, ਤਾਂ 2,004 ਕਾਲਾਂ ਅਤੇ ਕਤਲ ਦੀ ਸਾਜ਼ਿਸ਼ ਦਾ ਪਰਦਾਫਾਸ਼ ਹੋ ਗਿਆ।
ਪੁਲਿਸ ਨੇ ਮੁੱਖ ਮੁਲਜ਼ਮ ਸੀਆ ਗੋਇਲ ਅਤੇ ਚੇਤਨ ਚੌਧਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਸੀਆ ਦੇ ਬਿਆਨਾਂ ਦੀ ਕਰਾਸ-ਵੈਰੀਫਿਕੇਸ਼ਨ ਲਈ ਉਸ ਦੇ ਭਰਾ ਸਾਹਿਲ ਤੋਂ 10 ਘੰਟੇ ਪੁੱਛਗਿੱਛ ਕੀਤੀ ਗਈ। ਹੁਣ ਮਹਾਰਾਸ਼ਟਰ ਸਰਕਾਰ ਨੇ ਅਗਰਵਾਲ ਪਰਿਵਾਰ ਦੀ ਮੰਗ ‘ਤੇ ਇਸ ਕੇਸ ਨੂੰ ਫਾਸਟ-ਟਰੈਕ ਅਦਾਲਤ ਵਿੱਚ ਚਲਾਉਣ ਦੀ ਮਨਜ਼ੂਰੀ ਦੇ ਦਿੱਤੀ ਹੈ ਅਤੇ ਦੇਸ਼ ਦੇ ਮੰਨੇ-ਪ੍ਰਮੰਨੇ ਸਰਕਾਰੀ ਵਕੀਲ ਉੱਜਵਲ ਨਿਕਮ ਇਸ ਕੇਸ ਵਿੱਚ ਮੁਲਜ਼ਮਾਂ ਨੂੰ ਸਜ਼ਾ ਦਿਵਾਉਣ ਲਈ ਵਿਸ਼ੇਸ਼ ਵਕੀਲ ਨਿਯੁਕਤ ਕੀਤੇ ਗਏ ਹਨ।
