ਫੈਕਟ ਸਮਾਚਾਰ ਸੇਵਾ
ਨੈਨੀਤਾਲ , ਅਕਤੂਬਰ 7
ਨਵਰਾਤਰੀ ‘ਤੇ ਲੋਕਾਂ ਨੂੰ ਘਰਾਂ ‘ਚ ਗੰਗਾ ਜਲ ਛਿੜਕਣ ਲਈ ਜ਼ਿਆਦਾ ਪੈਸੇ ਦੇਣੇ ਪੈਣਗੇ। ਹੁਣ ਡਾਕਖਾਨੇ ਤੋਂ ਮਿਲਣ ਵਾਲੇ ਗੰਗਾ ਜਲ ‘ਤੇ 18 ਫੀਸਦੀ ਜੀਐਸਟੀ ਲਗਾਇਆ ਗਿਆ ਹੈ। ਹੁਣ ਲੋਕਾਂ ਨੂੰ 250 ਮਿਲੀਲੀਟਰ ਦੀ ਬੋਤਲ ਲਈ 35 ਰੁਪਏ ਦੇਣੇ ਪੈਣਗੇ ਜੋ 30 ਰੁਪਏ ਵਿੱਚ ਮਿਲਦੀ ਸੀ।
ਕੇਂਦਰ ਸਰਕਾਰ ਦੀ ‘ਗੰਗਾ ਜਲ ਆਪਕੇ ਦਵਾਰ’ ਯੋਜਨਾ ਸਾਲ 2016 ‘ਚ ਸ਼ੁਰੂ ਹੋਈ ਸੀ। ਇਸ ਦਾ ਉਦੇਸ਼ ਗੰਗਾ ਜਲ ਲੋਕਾਂ ਨੂੰ ਆਸਾਨੀ ਨਾਲ ਉਪਲਬਧ ਕਰਵਾਉਣਾ ਅਤੇ ਡਾਕਘਰਾਂ ਦੀ ਆਮਦਨ ਵਧਾਉਣਾ ਸੀ। ਪਹਿਲਾਂ ਰਿਸ਼ੀਕੇਸ਼ ਅਤੇ ਗੰਗੋਤਰੀ ਤੋਂ ਆਉਣ ਵਾਲੇ 200 ਅਤੇ 500 ਮਿਲੀਲੀਟਰ ਗੰਗਾ ਜਲ ਦੀ ਕੀਮਤ ਕ੍ਰਮਵਾਰ 28 ਰੁਪਏ ਅਤੇ 38 ਰੁਪਏ ਸੀ। ਵਰਤਮਾਨ ‘ਚ ਡਾਕ ਵਿਭਾਗ ਗੰਗੋਤਰੀ ਦੇ ਗੰਗਾਜਲ ਦੀ 250 ਐਮਐਲਏ ਦੀ ਬੋਤਲ ਉਪਲੱਬਧ ਕਰਵਾ ਰਹੀ ਹੈ ਜਿਸ ਦੀ ਕੀਮਤ 30 ਰੁਪਏ ਸੀ। 18 ਫੀਸਦੀ ਜੀਐਸਟੀ ਲਾਗੂ ਹੋਣ ਤੋਂ ਬਾਅਦ ਹੁਣ ਇਸ ਦੀ ਕੀਮਤ 35 ਰੁਪਏ ਹੋ ਗਈ ਹੈ। ਡਾਕ ਵਿਭਾਗ ਦੇ ਅਧਿਕਾਰੀਆਂ ਮੁਤਾਬਕ ਸਰਕਲ ਦੇਹਰਾਦੂਨ ਤੋਂ ਹੁਕਮ ਜਾਰੀ ਹੋਣ ਤੋਂ ਬਾਅਦ ਗੰਗਾ ਜਲ ਵਧੀ ਹੋਈ ਕੀਮਤ ‘ਤੇ ਉਪਲਬਧ ਕਰਵਾਇਆ ਜਾ ਰਿਹਾ ਹੈ।
ਹੁਣ ਗੰਗਾ ਜਲ ਆਨਲਾਈਨ ਮੰਗਵਾਉਣ ‘ਤੇ ਇਕ ਬੋਤਲ ਦੀ ਕੀਮਤ 125 ਰੁਪਏ ਹੋਵੇਗੀ। ਜੇਕਰ ਤੁਸੀਂ ਭਾਰਤੀ ਡਾਕ ਵਿਭਾਗ ਦੀ ਵੈੱਬਸਾਈਟ ਤੋਂ ਗੰਗਾਜਲ ਖਰੀਦਦੇ ਹੋ, ਤਾਂ ਸਪੀਡ ਪੋਸਟ ਚਾਰਜ ਦੇ ਨਾਲ, ਗੰਗੋਤਰੀ ਗੰਗਾਜਲ ਦੀ ਇੱਕ 250 ਮਿਲੀਲੀਟਰ ਦੀ ਬੋਤਲ 125 ਰੁਪਏ ਵਿੱਚ, ਦੋ ਬੋਤਲਾਂ 210 ਰੁਪਏ ਵਿੱਚ ਅਤੇ ਚਾਰ ਬੋਤਲਾਂ 345 ਰੁਪਏ ਵਿੱਚ ਉਪਲਬਧ ਹੋਣਗੀਆਂ।
