ਨਵੀਂ ਦਿੱਲੀ : ਅਮਰੀਕੀ ਹਵਾਈ ਸੈਨਾ ਨੇ ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਹਵਾ ਵਿੱਚ ਮਾਰ ਕਰਨ ਵਾਲੀ ਹਾਈਪਰਸੋਨਿਕ ਮਿਜ਼ਾਈਲ ਦਾ ਸਫਲ ਪ੍ਰੀਖਣ ਕੀਤਾ ਹੈ। ਅਮਰੀਕੀ ਹਵਾਈ ਸੈਨਾ ਦੇ ਅਨੁਸਾਰ, ਇਹ ਪ੍ਰੀਖਣ ਐਤਵਾਰ ਨੂੰ ਗੁਆਮ ਮਿਲਟਰੀ ਬੇਸ ਤੋਂ ਕੀਤਾ ਗਿਆ ਸੀ, ਜਦੋਂ ਇੱਕ ਬੀ-52 ਬੰਬਾਰ ਨੇ ਏਅਰ-ਲਾਂਚਡ ਰੈਪਿਡ ਰਿਸਪਾਂਸ ਵੈਪਨ (ਏਆਰਆਰਡਬਲਯੂ) ਨੂੰ ਲੈ ਕੇ ਉਡਾਣ ਭਰੀ ਅਤੇ ਥੋੜ੍ਹੀ ਦੇਰ ਬਾਅਦ ਇਸਨੂੰ ਲਾਂਚ ਕੀਤਾ। ਹਾਲਾਂਕਿ ਅਮਰੀਕੀ ਹਵਾਈ ਸੈਨਾ ਨੇ ਇਹ ਨਹੀਂ ਦੱਸਿਆ ਕਿ ਉਸਦਾ ਪ੍ਰੀਖਣ ਸਫਲ ਰਿਹਾ ਜਾਂ ਨਹੀਂ।
ਗੁਆਮ ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਚੀਨ ਦੇ ਨੇੜੇ ਸਥਿਤ ਇੱਕ ਟਾਪੂ ਹੈ, ਜਿੱਥੇ ਅਮਰੀਕਾ ਦਾ ਇੱਕ ਫੌਜੀ ਅੱਡਾ ਅਤੇ ਇੱਕ ਮਹੱਤਵਪੂਰਨ ਰਣਨੀਤਕ ਕੇਂਦਰ ਹੈ। ਇਹ ਪਹਿਲੀ ਵਾਰ ਹੈ ਜਦੋਂ ਅਮਰੀਕਾ ਨੇ ਚੀਨ ਦੇ ਨੇੜੇ ਏਆਰਆਰਡਬਲਯੂ ਜਾਂ ਕਿਸੇ ਹਾਈਪਰਸੋਨਿਕ ਮਿਜ਼ਾਈਲ ਦਾ ਪ੍ਰੀਖਣ ਕੀਤਾ ਹੈ। ਇਹ ਪ੍ਰੀਖਣ ਚੀਨ ਸਮੇਤ ਪੂਰੇ ਪ੍ਰਸ਼ਾਂਤ ਖੇਤਰ ਲਈ ਵੱਡਾ ਸੰਦੇਸ਼ ਹੈ। ਡਿਫੈਂਸ ਨਿਊਜ਼ ਦੇ ਮੁਤਾਬਕ ਅਮਰੀਕੀ ਹਵਾਈ ਸੈਨਾ ਦੁਆਰਾ ਕੀਤਾ ਗਿਆ ਇਹ ਪ੍ਰੀਖਣ ਪੈਂਟਾਗਨ ‘ਤੇ ਹਾਈਪਰਸੋਨਿਕ ਹਥਿਆਰਾਂ ਦੀ ਦੌੜ ‘ਚ ਬਣੇ ਰਹਿਣ ਦੇ ਵਧਦੇ ਦਬਾਅ ਦੇ ਵਿਚਕਾਰ ਆਇਆ ਹੈ। ਅਮਰੀਕਾ ਲੰਬੇ ਸਮੇਂ ਤੋਂ ਦਬਾਅ ਵਿੱਚ ਹੈ ਕਿਉਂਕਿ ਉਸਦੇ ਦੋ ਵੱਡੇ ਵਿਰੋਧੀ ਚੀਨ ਅਤੇ ਰੂਸ ਨੇ ਇਸ ਖੇਤਰ ਵਿੱਚ ਬਹੁਤ ਤਰੱਕੀ ਕੀਤੀ ਹੈ।
ਇੰਨਾ ਹੀ ਨਹੀਂ, ਰੂਸ ਅਤੇ ਚੀਨ ਦੇ ਨੇੜੇ ਉੱਤਰੀ ਕੋਰੀਆ ਵੀ ਹਾਈਪਰਸੋਨਿਕ ਹਥਿਆਰਾਂ ਦੀ ਦੌੜ ਵਿੱਚ ਸਭ ਤੋਂ ਅੱਗੇ ਹੈ। ਕਿਮ ਜੋਂਗ ਉਨ ਦੇ ਸ਼ਾਸਨ ਵਾਲੇ ਉੱਤਰੀ ਕੋਰੀਆ ਨੇ ਵੀ ਮੰਗਲਵਾਰ ਨੂੰ ਇੱਕ ਮੱਧਮ ਦੂਰੀ ਦੀ ਹਾਈਪਰਸੋਨਿਕ ਮਿਜ਼ਾਈਲ ਲਈ ਠੋਸ ਈਂਧਨ ਇੰਜਣ ਦਾ ਸਫਲ ਪ੍ਰੀਖਣ ਕੀਤਾ। ਦੱਖਣੀ ਕੋਰੀਆ ਦੇ ਰਾਸ਼ਟਰੀ ਮੀਡੀਆ ਨੇ ਬੁੱਧਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।
