ਫੈਕਟ ਸਮਾਚਾਰ ਸੇਵਾ
ਨਵੀਂ ਦਿੱਲੀ , ਸਤੰਬਰ 23
ਜਾਪਾਨ ਦੇ ਆਈਚੀ-ਨਾਗੋਯਾ ’ਚ ਚੱਲ ਰਹੀਆਂ ਏਸ਼ੀਅਨ ਗੇਮਜ਼ 2026 ’ਚ ਭਾਰਤੀ ਖਿਡਾਰੀਆਂ ਦਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਹੈ। ਖੇਡਾਂ ਦੇ ਚੌਥੇ ਦਿਨ ਦਿੱਗਜ ਵੇਟਲਿਫਟਰ ਮੀਰਾਬਾਈ ਚਾਨੂ ਨੇ ਮਹਿਲਾਵਾਂ ਦੇ 49 ਕਿਲੋਗ੍ਰਾਮ ਵਰਗ ’ਚ ਸਿਲਵਰ ਮੈਡਲ ਜਿੱਤ ਕੇ ਇਤਿਹਾਸ ਰਚ ਦਿੱਤਾ। ਇਸ ਦੇ ਨਾਲ ਹੀ ਭਾਰਤ ਦੀ ਪੁਰਸ਼ ਸਕੀਟ ਟੀਮ ਨੇ ਵੀ ਕਾਂਸੀ ਦਾ ਤਮਗਾ ਆਪਣੇ ਨਾਮ ਕਰ ਲਿਆ।
ਮੀਰਾਬਾਈ ਚਾਨੂ ਲਈ ਇਹ ਮੈਡਲ ਖਾਸ ਹੈ, ਕਿਉਂਕਿ ਏਸ਼ੀਅਨ ਗੇਮਜ਼ ’ਚ ਇਹ ਉਨ੍ਹਾਂ ਦਾ ਪਹਿਲਾ ਤਮਗਾ ਹੈ। ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਉਨ੍ਹਾਂ ਨੇ ਸਿਲਵਰ ਮੈਡਲ ਆਪਣੇ ਨਾਮ ਕੀਤਾ। ਇਸ ਨਾਲ ਏਸ਼ੀਅਨ ਗੇਮਜ਼ ’ਚ ਲੰਬੇ ਸਮੇਂ ਤੋਂ ਚੱਲ ਰਹੇ ਉਨ੍ਹਾਂ ਦੇ ਮੈਡਲ ਦੇ ਇੰਤਜ਼ਾਰ ਦਾ ਵੀ ਅੰਤ ਹੋ ਗਿਆ। 49 ਕਿਲੋਗ੍ਰਾਮ ਵਰਗ ’ਚ ਉੱਤਰੀ ਕੋਰੀਆ ਦੀ ਰੀ ਸੋਂਗ ਗਮ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਗੋਲਡ ਮੈਡਲ ਜਿੱਤਿਆ। ਉਨ੍ਹਾਂ ਨੇ ਕਲੀਨ ਐਂਡ ਜਰਕ ’ਚ 121 ਕਿਲੋਗ੍ਰਾਮ ਭਾਰ ਚੁੱਕ ਕੇ ਏਸ਼ੀਅਨ ਗੇਮਜ਼ ਦਾ ਰਿਕਾਰਡ ਵੀ ਤੋੜਿਆ।
ਵੇਟਲਿਫਟਿੰਗ ਤੋਂ ਬਾਅਦ ਸ਼ੂਟਿੰਗ ’ਚ ਵੀ ਭਾਰਤ ਲਈ ਚੰਗੀ ਖ਼ਬਰ ਆਈ। ਭਾਰਤ ਦੀ ਪੁਰਸ਼ ਸਕੀਟ ਟੀਮ ਨੇ ਕਾਂਸੀ ਦਾ ਤਮਗਾ ਜਿੱਤ ਕੇ ਦੇਸ਼ ਦੀ ਮੈਡਲ ਸੂਚੀ ’ਚ ਇੱਕ ਹੋਰ ਤਮਗਾ ਜੋੜ ਦਿੱਤਾ। ਇਸ ਤੋਂ ਪਹਿਲਾਂ ਮਹਿਲਾ ਸ਼ੂਟਰਾਂ ਨੇ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਸੀ।
ਏਸ਼ੀਅਨ ਗੇਮਜ਼ ਦੇ ਤੀਜੇ ਦਿਨ ਤੱਕ ਭਾਰਤ ਦੇ ਖਾਤੇ ’ਚ 7 ਮੈਡਲ ਆ ਚੁੱਕੇ ਸਨ। ਹੁਣ ਚੌਥੇ ਦਿਨ ਭਾਰਤੀ ਖਿਡਾਰੀਆਂ ਤੋਂ ਹੋਰ ਮੈਡਲਾਂ ਦੀ ਉਮੀਦ ਹੈ। ਸ਼ੂਟਿੰਗ ’ਚ ਮਨੂ ਭਾਕਰ ਫਾਈਨਲ ’ਚ ਪਹੁੰਚ ਚੁੱਕੀ ਹੈ, ਜਿਸ ਕਾਰਨ ਭਾਰਤ ਦੀਆਂ ਨਜ਼ਰਾਂ ਹੁਣ ਅਗਲੇ ਤਮਗੇ ’ਤੇ ਟਿਕੀਆਂ ਹੋਈਆਂ ਹਨ।
