ਚੰਡੀਗੜ੍ਹ ਹਵਾਈ ਅੱਡੇ ਦਾ ਸਰਦੀਆਂ ਦਾ ਸ਼ਡਿਊਲ: ਅੱਧੀ ਰਾਤ 12:45 ਵਜੇ ਬੰਗਲੁਰੂ ਲਈ ਉਡਾਣ ਭਰੇਗੀ ਏਅਰ ਇੰਡੀਆ ਐਕਸਪ੍ਰੈਸ, ਮੁੰਬਈ ਤੋਂ ਵੀ ਪਹੁੰਚੇਗੀ ਰਾਤ ਦੀ ਫਲਾਈਟ
ਚੰਡੀਗੜ੍ਹ, 20 ਅਕਤੂਬਰ, 2026: ਚੰਡੀਗੜ੍ਹ ਦਾ ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡਾ ਹੁਣ ਹੌਲੀ-ਹੌਲੀ 24 ਘੰਟੇ ਨਿਰੰਤਰ ਸੰਚਾਲਨ ਵੱਲ ਵਧ ਰਿਹਾ ਹੈ। ਸਰਦੀਆਂ ਦੇ ਨਵੇਂ ਸ਼ਡਿਊਲ ਅਨੁਸਾਰ, ਹਵਾਈ ਅੱਡੇ ਤੋਂ ਅੱਧੀ ਰਾਤ ਤੋਂ ਬਾਅਦ ਵੀ ਉਡਾਣਾਂ ਦੀ ਆਵਾਜਾਈ ਸ਼ੁਰੂ ਹੋ ਜਾਵੇਗੀ। ਏਅਰ ਇੰਡੀਆ ਐਕਸਪ੍ਰੈਸ ਦੀ ਬੰਗਲੁਰੂ ਜਾਣ ਵਾਲੀ ਉਡਾਣ ਅੱਧੀ ਰਾਤ ਨੂੰ 12:45 ਵਜੇ ਰਵਾਨਾ ਹੋਵੇਗੀ, ਜਦੋਂ ਕਿ ਮੁੰਬਈ ਤੋਂ ਇੰਡੀਗੋ ਦੀ ਇੱਕ ਉਡਾਣ ਰਾਤ 12:20 ਵਜੇ ਚੰਡੀਗੜ੍ਹ ਉਤਰੇਗੀ। ਇਸ ਨਵੇਂ ਪ੍ਰਬੰਧ ਨਾਲ ਦੇਰ ਰਾਤ ਯਾਤਰਾ ਕਰਨ ਵਾਲੇ ਕਾਰੋਬਾਰੀਆਂ ਅਤੇ ਆਈਟੀ ਖੇਤਰ ਦੇ ਪੇਸ਼ੇਵਰਾਂ ਨੂੰ ਵੱਡਾ ਫ਼ਾਇਦਾ ਹੋਵੇਗਾ।
ਗਰਮੀਆਂ ਦੇ ਸ਼ਡਿਊਲ ਦੌਰਾਨ ਹਵਾਈ ਅੱਡੇ ਤੋਂ ਆਖਰੀ ਉਡਾਣ ਰਾਤ 10:55 ਵਜੇ ਪੁਣੇ ਲਈ ਰਵਾਨਾ ਹੁੰਦੀ ਸੀ, ਜਿਸ ਤੋਂ ਬਾਅਦ ਰਾਤ ਵੇਲੇ ਕੋਈ ਹੋਰ ਉਡਾਣ ਨਹੀਂ ਸੀ। ਹੁਣ ਸਰਦੀਆਂ ਦੇ ਸ਼ਡਿਊਲ ਵਿੱਚ ਏਅਰ ਇੰਡੀਆ ਐਕਸਪ੍ਰੈਸ ਦੀ ਉਡਾਣ ਸਵੇਰੇ 9:10 ਵਜੇ ਬੰਗਲੁਰੂ ਤੋਂ ਚੱਲ ਕੇ ਦੁਪਹਿਰ 12:20 ਵਜੇ ਚੰਡੀਗੜ੍ਹ ਪਹੁੰਚੇਗੀ, ਜਿੱਥੋਂ ਇਹ ਦੁਪਹਿਰ 1:50 ਵਜੇ ਸ਼ਾਰਜਾਹ ਲਈ ਉਡਾਣ ਭਰੇਗੀ। ਸ਼ਾਰਜਾਹ ਤੋਂ ਰਾਤ 11:05 ਵਜੇ ਵਾਪਸ ਚੰਡੀਗੜ੍ਹ ਲੈਂਡ ਕਰਨ ਤੋਂ ਬਾਅਦ, ਇਹੋ ਉਡਾਣ ਰਾਤ 12:45 ਵਜੇ ਮੁੜ ਬੰਗਲੁਰੂ ਲਈ ਰਵਾਨਾ ਹੋਵੇਗੀ, ਜਿਸ ਦਾ ਅਨੁਮਾਨਿਤ ਫਲੈਕਸੀ ਕਿਰਾਇਆ ₹7,823 ਰੱਖਿਆ ਗਿਆ ਹੈ।
ਇਸੇ ਤਰ੍ਹਾਂ ਇੰਡੀਗੋ ਵੱਲੋਂ ਵੀ ਮੁੰਬਈ ਤੋਂ ਰਾਤ 10:05 ਵਜੇ ਉਡਾਣ ਭਰ ਕੇ ਰਾਤ 12:20 ਵਜੇ ਚੰਡੀਗੜ੍ਹ ਪਹੁੰਚਣ ਵਾਲੀ ਫਲਾਈਟ ਸ਼ੁਰੂ ਕੀਤੀ ਜਾ ਰਹੀ ਹੈ, ਜਿਸ ਦਾ ਕਿਰਾਇਆ ₹9,823 ਹੋਵੇਗਾ। ਫਿਲਹਾਲ ਚੰਡੀਗੜ੍ਹ ਤੋਂ ਮੁੰਬਈ ਲਈ ਸਵੇਰੇ 5:15 ਵਜੇ ਜਾਣ ਵਾਲੀ ਇੰਡੀਗੋ ਦੀ ਫਲਾਈਟ ਦਿਨ ਦੀ ਪਹਿਲੀ ਉਡਾਣ ਹੈ। ਅੱਧੀ ਰਾਤ ਤੋਂ ਬਾਅਦ ਉਡਾਣਾਂ ਦੇ ਚੱਲਣ ਨਾਲ ਹਵਾਈ ਅੱਡੇ ‘ਤੇ 24 ਘੰਟੇ ਗਤੀਵਿਧੀਆਂ ਜਾਰੀ ਰਹਿਣਗੀਆਂ।
