ਸੁਮੀ, 4 ਅਕਤੂਬਰ (2026): ਯੂਕਰੇਨ ਦੇ ਸੁਮੀ ਸ਼ਹਿਰ ‘ਚ ਉਸ ਵੇਲੇ ਸਨਸਨੀ ਫੈਲ ਗਈ, ਜਦੋਂ ਆਸਮਾਨ ਤੋਂ ਆਏ ਇੱਕ ਰੂਸੀ ਡਰੋਨ ਨੇ ਭਾਰਤੀ ਫਾਰਮਾਸਿਊਟੀਕਲ ਸਮੂਹ ‘ਕੁਸੁਮ ਗਰੁੱਪ’ ਦੇ ਵਿਸ਼ਾਲ ਪਲਾਂਟ ਨੂੰ ਨਿਸ਼ਾਨਾ ਬਣਾ ਕੇ ਪਰਖੱਚੇ ਉਡਾ ਦਿੱਤੇ। ਜੰਗ ਦੇ ਭਿਆਨਕ ਮਾਹੌਲ ‘ਚ ਵੀ ਜੀਵਨ ਬਚਾਉਣ ਵਾਲੀਆਂ ਦਵਾਈਆਂ ਤਿਆਰ ਕਰ ਰਹੇ ਇਸ ਪਲਾਂਟ ‘ਤੇ ਹੋਏ ਅਚਾਨਕ ਹਮਲੇ ਨਾਲ ਪੂਰੇ ਇਲਾਕੇ ‘ਚ ਹੜਕੰਪ ਮਚ ਗਿਆ। ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ ਪਲਾਂਟ ਦੀ ਮੁੱਖ ਇਮਾਰਤ ਛਿਣ ਭਰ ‘ਚ ਮਲਬੇ ‘ਚ ਤਬਦੀਲ ਹੋ ਗਈ ਅਤੇ ਅਸਮਾਨ ‘ਚ ਧੂੰਏਂ ਦੇ ਕਾਲੇ ਬੱਦਲ ਛਾ ਗਏ।
ਇਸ ਦਰਦਨਾਕ ਘਟਨਾ ‘ਚ ਇੱਕ ਵਿਅਕਤੀ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ ਕਈ ਕਰਮਚਾਰੀ ਗੰਭੀਰ ਰੂਪ ‘ਚ ਜ਼ਖਮੀ ਹੋ ਗਏ। ਮਲਬਾ ਹਟਾਉਣ ਦਾ ਕੰਮ ਲਗਾਤਾਰ ਜਾਰੀ ਹੋਣ ਕਾਰਨ ਜ਼ਖਮੀਆਂ ਅਤੇ ਨੁਕਸਾਨ ਦਾ ਅੰਕੜਾ ਹੋਰ ਵਧਣ ਦੀ ਆਸ਼ੰਕਾ ਜਤਾਈ ਜਾ ਰਹੀ ਹੈ। ਸ਼ੁਰੂਆਤੀ ਅਨੁਮਾਨਾਂ ਅਨੁਸਾਰ ਇਸ ਹਮਲੇ ਨਾਲ ਲਗਭਗ 400 ਕਰੋੜ ਰੁਪਏ (₹4 ਬਿਲੀਅਨ) ਤੋਂ ਵੱਧ ਦਾ ਭਾਰੀ ਆਰਥਿਕ ਨੁਕਸਾਨ ਹੋਇਆ ਹੈ।
1994 ਵਿੱਚ ਇੱਕ ਵਿਤਰਕ ਵਜੋਂ ਸਫ਼ਰ ਸ਼ੁਰੂ ਕਰਨ ਵਾਲੇ ਭਾਰਤੀ ਨਾਗਰਿਕ ਰਾਜੀਵ ਗੁਪਤਾ ਦੇ ਇਸ ‘ਕੁਸੁਮ ਗਰੁੱਪ’ ਨੇ 2009 ਵਿੱਚ ਸੁਮੀ ਵਿਖੇ ਇਹ ਅਤਿ-ਆਧੁਨਿਕ ਨਿਰਮਾਣ ਯੂਨਿਟ ਸਥਾਪਿਤ ਕੀਤਾ ਸੀ, ਜੋ 9 ਤੋਂ ਵੱਧ ਦੇਸ਼ਾਂ ਨੂੰ ਦਵਾਈਆਂ ਨਿਰਯਾਤ ਕਰਦਾ ਹੈ। ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਡੀਮੀਰ ਜ਼ੇਲੇਂਸਕੀ ਨੇ ਸੋਸ਼ਲ ਮੀਡੀਆ ‘ਤੇ ਇਸ ਬੁਜ਼ਦਿਲਾਨਾ ਹਮਲੇ ਦੀ ਸਖ਼ਤ ਸ਼ਬਦਾਂ ‘ਚ ਨਿੰਦਾ ਕਰਦਿਆਂ ਪੀੜਤ ਪਰਿਵਾਰਾਂ ਨਾਲ ਹਮਦਰਦੀ ਪ੍ਰਗਟਾਈ ਹੈ। ਰੂਸ ਵੱਲੋਂ ਰਿਹਾਇਸ਼ੀ ਅਤੇ ਉਦਯੋਗਿਕ ਖੇਤਰਾਂ ‘ਤੇ ਤੇਜ਼ ਕੀਤੇ ਗਏ ਇਹਨਾਂ ਹਮਲਿਆਂ ਨੇ ਹੁਣ ਭਾਰਤੀ ਕਾਰੋਬਾਰਾਂ ਨੂੰ ਵੀ ਇਸ ਯੁੱਧ ਦੀ ਭੱਠੀ ‘ਚ ਝੁਲਸਣ ਲਈ ਮਜ਼ਬੂਰ ਕਰ ਦਿੱਤਾ ਹੈ।
