ਦਿੱਲੀ ਤੋਂ ਟੂਰਿਸਟ ਤੇ ਸਥਾਨਕ ਲੋਕ ਹੁਣ ਸਿੱਧੇ ਲੇਹ ਪਹੁੰਚ ਸਕਣਗੇ। ਹਿਮਾਚਲ ਰੋਡਵੇਜ਼ ਟਰਾਂਸਪੋਰਟ ਕਾਰਪੋਰੇਸ਼ਨ ਨੇ ਦੁਨੀਆ ਦੇ ਸਭ ਤੋਂ ਉੱਚੇ ਰੂਟ ਦਿੱਲੀ-ਲੇਹ ‘ਤੇ ਲਗਭਗ 9 ਮਹੀਨਿਆਂ ਬਾਅਦ ਬੱਸ ਸੇਵਾ ਸ਼ੁਰੂ ਕਰ ਦਿੱਤੀ ਹੈ। ਇਹ ਬੱਸ ਸੇਵਾ ਅੱਜ 5.30 ਵਜੇ ਕੇਲਾਂਗ ਤੋਂ ਦਿੱਲੀ ਜ਼ਰੀਏ ਰਵਾਨਾ ਹੋਈ।
ਪਹਿਲੇ ਹੀ ਦਿਨ ਕੇਲਾਂਗ ਤੋਂ 30 ਯਾਤਰੀ ਆਪਣੇ ਅਗਲੇ ਪੜਾਅ ਵੱਲ ਬੱਸ ਵਿਚ ਨਿਕਲੇ। HRTC ਨੇ ਆਨਲਾਈਨ ਬੁਕਿੰਗ ਵੀ ਸ਼ੁਰੂ ਕਰ ਦਿੱਤੀ ਹੈ। ਇਸ ਰੂਟ ‘ਤੇ ਬੱਸ ਸੇਵਾ ਸ਼ੁਰੂ ਹੋਣ ਨਾਲ ਲੋਕ ਹੁਣ ਦਿੱਲੀ, ਹਰਿਆਣਾ, ਪੰਜਾਬ, ਹਿਮਾਚਲ ਸਣੇ ਲੇਹ-ਲੱਦਾਖ ਦੀ ਸੈਰ ਇਕ ਹੀ ਬੱਸ ਤੋਂ ਕਰ ਸਕਣਗੇ।
ਦਿੱਲੀ ਤੋਂ ਲੇਹ ਤੱਕ ਲਗਭਗ 1026 ਕਿਲੋਮੀਟਰ ਲੰਬੇ ਸਫਰ ਦਾ 1740 ਰੁਪਏ ਕਿਰਾਇਆ ਦੇਣਾ ਹੋਵੇਗਾ। ਇਹ ਸਫਰ ਲਗਭਗ 30 ਘੰਟੇ ਵਿਚ ਪੂਰਾ ਹੋਵੇਗਾ। ਪਿਛਲੇ ਸਾਲ ਬਰਫਬਾਰੀ ਦੇ ਬਾਅਦ ਸਤੰਬਰ 2022 ਵਿਚ ਇਹ ਬੱਸ ਬੰਦ ਹੋ ਗਈ ਸੀ। ਬੀਤੇ ਸਾਲ 15 ਜੂਨ ਨੂੰ ਬੱਸ ਸਰਵਿਸ ਸ਼ੁਰੂ ਹੋਈ ਸੀ ਪਰ ਇਸ ਵਾਰ ਇਕ ਹਫਤੇ ਪਹਿਲਾਂ ਸ਼ੁਰੂ ਹੋ ਗਈ।
